ការងារផ្ទះកំប៉ិកកំប៉ុកទាំង៧ ដែលឪពុកម្តាយ គួរបង្រៀនឲ្យកូនៗធ្វើ
- ការអប់រំ
- ខែវិច្ឆិកា 22, 2019
សកម្មភាពរបស់ឪពុកម្តាយ នឹងជះឥទ្ធិពលដល់កូនៗ ដែលពួកគេនឹងអាចរៀនសូត្រ ហើយងាយនឹងធ្វើត្រាប់តាមស្ទើរតែគ្រប់ឥរិយាបទរបស់លោកអ្នក។ ម្យ៉ាងទៀត ក្នុងនាមជាអាណាព្យាបាល ជាឪពុកម្តាយ ដែលមានកូនតូចនៅក្នុងបន្ទុក គួរបង្ហាត់បង្ហាញបង្រៀនពួកគេ ឱ្យចេះធ្វើការងារកំប៉ិកកំប៉ុក ការងារស្រាលៗនៅក្នុងផ្ទះ ដែលសកម្មភាពទាំងនេះ នឹងបានជាទម្លាប់ដ៏ល្អសម្រាប់ពួកគេទៅថ្ងៃអនាគត ក្លាយជាមនុស្សពេញវ័យដែលមានទំនួលខុសត្រូវលើកិច្ចការងារផ្សេងៗរបស់ខ្លួន។ ថ្ងៃនេះ konkmeng សូមលើកយកការងារចំនួន៧យ៉ាងដែលជឿថា កូនៗរបស់លោកអ្នកអាចធ្វើបាន៖
១.រៀបចំទុកដាក់សម្ភារៈលេង និងសៀវភៅឱ្យមានរបៀប
ជារឿងដ៏ល្អមួយ ដែលក្មេងៗមានទម្លាប់ចេះរៀបចំទុកដាក់សម្ភារៈរបស់ខ្លួនបន្ទាប់ពីលេងរួច។ ក្នុងនាមជាឪពុកម្តាយ គួរតែបង្កើតកន្លែងដាក់សម្ភារៈមួយឱ្យកូនៗ ដូចជា ថ្នើរសម្រាប់ដាក់សៀវភៅ កន្រ្តក ឬកេសសម្រាប់ដាក់សម្ភារៈក្មេងលេងជាដើម។ លោកអ្នកក៏គួរតែឧស្សាហ៍ពិនិត្យឱ្យញឹកញាប់ថា កូនៗរបស់លោកអ្នក មានភ្លេចរៀបចំរបស់របរដែរឬទេ ប្រសិនបើមាន គួរតែរំឭកពួកគេឱ្យរៀបចំទុកដាក់ទៅតាមកន្លែងដើម។ បើសិនពួកគេមិនដឹងថា ដាក់នៅកន្លែងណាទេនោះ លោកអ្នក គួរតែចង្អុលបង្ហាញប្រាប់ ឬនាំពួកគេយករបស់ទាំងនោះ ទៅដាក់ត្រង់កន្លែងដែលត្រូវទុក ឱ្យមានសណ្ដាប់ធ្នាប់ល្អ។
២.ប្រមូលសំលៀកបំពាក់កខ្វក់
សំលៀកបំពាក់ គឺជារបស់ស្រាលៗ និងងាយស្រួលក្នុងការប្រមូលដាក់ចូលក្នុងកញ្ច្រែង ឬក្នុងម៉ាស៊ីនបោកខោអាវ។ លោកអ្នកគួរតែអនុញ្ញាត្តិឱ្យពួកគេ ជួយរើសសំលៀកបំពាក់ដាក់ក្នុងម៉ាស៊ីន ដោយការលេងល្បែងរើសពណ៌សំលៀកបំពាក់ ដាក់ចូលម្ដងមួយៗជាមួយពួកគេ ដែលធ្វើពួកគេយល់ថា សកម្មភាពបែបនេះជាកិច្ចការសប្បាយ ហើយគួរធ្វើនៅពេលក្រោយៗទៀត។
៣.ជួយមើលថែសត្វចិញ្ចឹមក្នុងផ្ទះ
ការមើលថែសត្វចិញ្ចឹម ដោយបង្រៀនឱ្យកូនៗលោកអ្នកយល់នូវក្តីស្រលាញ់ចំពោះសត្វ និងពន្យល់ពួកគេឱ្យយល់ពីការគោរព ការឱ្យតម្លៃចំពោះភាវៈមានជីវិតដែលនៅជុំវិញ។ ប្រសិនបើផ្ទះលោកអ្នកមានចិញ្ចឹមនូវសត្វតូចៗ ដូចជា ទន្សាយ ឆ្មា ឬសុនខ ជាដើម លោកអ្នកគួរអនុញ្ញាតឱ្យពួកគេ រៀនដាក់ចំណីនៅក្នុងចានអាហារ ឬដាក់ទឹកឱ្យសត្វទាំងនោះផឹកជាដើម។
៤.ជូតសម្អាតកន្លែងកខ្វក់
អនាម័យ គឺជាផ្នែកមួយដ៏សំខាន់នៅក្នុងជីវិតរស់នៅប្រចាំថ្ងៃរបស់យើងម្នាក់ៗ ហើយការមានអនាម័យល្អក្នុងការរស់នៅ នឹងនាំមកនូវសុខភាពល្អ។ នៅក្នុងចំណុចនេះ លោកអ្នកជាឪពុកម្តាយ ឬអាណាព្យាបាល ក្រៅពីការបង្រៀនឱ្យចេះអនាម័យខ្លួនប្រាណហើយនោះ គួរបង្រៀនកូនៗឱ្យចេះជូតសម្អាតកន្លែង ដែលពួកគេលេង ឬកន្លែងគេង ឬក៏ជួយសម្អាតតុអាហារបន្ទាប់ពីទទួលទានរួចជាដើម។
៥.ជួយយួរថង់ម្ហូប
កូនៗអាចជួយទទួលថង់ម្ហូប បន្ទាប់ពីលោកអ្នកត្រឡប់មកពីផ្សារវិញ ឬជួយយករបស់របរតូចៗ ស្រាលៗទៅទុកដាក់តាមកន្លែងនីមួយៗ ដូចជារបស់របរខ្លះ ត្រូវយកទៅទុកនៅក្នុងទូរទឹកកក ខ្លះទៀតដាក់នៅលើថ្នើរជាដើម។ ឆ្លៀតឱកាសនេះ លោកអ្នកក៏គួរតែបង្ហាត់បង្ហាញរបស់ណា មានសារជាតិអ្វី ត្រូវញ៉ាំដោយរបៀបណា ឬគួរតែទុកដាក់របស់នោះនៅកន្លែងណាជាដើម។
៦.ជួយរៀបចំតុអាហារ
ក្មេងៗគួរតែរៀនចេះជួយរៀបចំតុអាហារ មុនពេលទទួលទានអាហារជុំគ្នា ដោយការជួយរៀបកូនកន្សែង ស្លាបព្រា ឬកែវទឹកដាក់លើតុ តាមកន្លែងនីមួយៗ លើកចានម្ហូបអាហារណាដែលមិនក្ដៅ និងជួយយករបស់ផ្សេងៗសម្រាប់ដាក់លើតុអាហារជាដើម។
៧.រៀបចំកន្លែងគេង
សម្រាប់ក្មេងៗ ការចេះរៀបចំកន្លែងគេងដោយខ្លួនឯង អាចនឹងត្រូវចំណាយពេលយូរ។ ក្មេងៗអាច រៀនតាមលំដាប់លំដោយ ដោយចាប់ផ្ដើមពីការទាញកម្រាលពូកមកគ្រប បន្ទាប់មកបត់ភួយ និងចុងក្រោយរៀបចំខ្នើយដាក់លើក្បាលដំណេកជាដើម៕
រក្សាសិទ្ធិដោយ៖ www.konkmeng.com
