konkmeng.com

ជាទូទៅ គេនិយមនិយាយថា ទម្លាប់ល្អគួរតែចាប់ផ្ដើមបណ្ដុះតាំងពីក្មេងៗ។ នៅពេលដែលក្មេងៗរៀនបង្កើតទម្លាប់ល្អៗតាំងពីវ័យកុមារ ពួកគេនឹងអាចសម្របខ្លួនបានយ៉ាងល្អនៅក្នុងមជ្ឈដ្ឋាននានា នៅពេលអនាគត។ ខាងក្រោមនេះ គឺជាទម្លាប់ល្អទាំង១០ចំណុច ដែលកូនៗរបស់លោកអ្នក គួររៀននៅពេលដែលពួកគេចាប់ផ្ដើមចូលសាលារៀនជាលើកដំបូង។

១.ញ៉ាំអាហារជំនួយដល់សុខភាព
ជារឿងធម្មតាដែលក្មេងៗចូលចិត្តញ៉ាំនំកញ្ចប់ និងនំផ្អែមៗ ដូច្នេះឪពុកម្ដាយគួរតែប្រាប់កូនៗពីគុណវិបត្តិរបស់នំកញ្ចប់ និងពន្យល់ពួកគេពីអត្ថប្រយោជន៍របស់អាហារណាដែលជំនួយដល់សុខភាពរបស់ពួកគេវិញ។ មិនតែប៉ុណ្ណោះ ឪពុកម្ដាយ ក៏គួរតែព្យាយាមធ្វើអាហារសម្រន់ដោយផ្ទាល់ដៃនៅផ្ទះខ្លួនឯង ដើម្បីឱ្យកូនៗទទួលទានផងដែរ។

២.ការរៀបចំឥរិយាបថលើតុអាហារ
ការរៀបចំឥរិយាបថពេលទទួលទានអាហារ គឺជាទម្លាប់មួយដ៏សំខាន់សម្រាប់បង្រៀនកូនៗផងដែរ។ ឪពុកម្តាយ គួរតែចាប់ផ្ដើមចាត់ទុកកូនៗ ឱ្យដូចជាមនុស្សពេញវ័យ ក្នុងអំឡុងពេលទទួលទានអាហារ។

៣.ដុសធ្មេញ២ដងក្នុងមួយថ្ងៃ
ក្មេងៗមួយចំនួនតែងមានទម្លាប់មិនចង់ដុសសម្អាតធ្មេញរបស់ពួកគេនោះទេ។ ឪពុកម្តាយ គួរតែចំណាយពេលពន្យល់ប្រាប់ពួកគេពីសារៈសំខាន់ នៃការដុសសម្អាតធ្មេញ ហើយព្យាយាមធ្វើឱ្យការដុសសម្អាតធ្មេញជាសកម្មភាពដ៏សប្បាយ ដូចជាការឱ្យរង្វាន់ពួកគេ បន្ទាប់ពីដុសធ្មេញហើយជាដើម។

៤.ចូលគេងឱ្យទៀងពេល
បើចង់បង្កើតទម្លាប់ឱ្យកូនៗ ចូលគេងឱ្យទៀងពេល គឺចាប់ផ្ដើមពីឪពុកម្តាយជាមុនសិន ពីព្រោះប្រសិនបើឪពុកម្តាយចូលគេង កូនៗនឺងគេងតាមដូចគ្នា។

៥.ការលេងកម្សាន្តនៅខាងក្រៅ
ក្មេងៗអាចញៀននឹងការមើលទូរទស្សន៍ និងការលេងហ្គេមយ៉ាងឆាប់រហ័ស។ ដូច្នេះឪពុកម្តាយ គួរតែបង្កើតទម្លាប់ ដោយនាំពួកគេចេញកម្សាន្តនៅខាងក្រៅជារៀងរាល់ថ្ងៃ ឬក្នុងកាលៈទេសៈដែលគួរ និងលើកទឹកចិត្តឱ្យពួកគេធ្វើសកម្មភាពផ្នែករាងកាយផងដែរ។

៦.បង្រៀនឱ្យចេះរៀបចំរបស់របរ
ឪពុកម្តាយ គួរតែលៃលកពេលវេលាបង្រៀនកូនៗ ឱ្យពួកគេចេះរៀបចំទុកដាក់សម្ភារៈ ដូចជា របស់លេង សៀវភៅ និងរបស់របរផ្សេងៗទៀតឱ្យមានរបៀបរបបត្រឹមត្រូវ។

៧.ទំនួលខុសត្រូវលើលុយកាក់
នៅពេលដែលកូនៗចេះចាយវាយលុយកាក់ ឪពុកម្តាយ គួរតែបង្រៀនពួកគេពីទំនួលខុសត្រូវលើលុយកាក់ ដោយការទិញកូនជ្រូក លើកទឹកចិត្តឱ្យពួកគេចេះសន្សំលុយ និងបង្រៀនពួកគេពីរបៀបគ្រប់គ្រងលុយឱ្យបានល្អ ជាដើម។

៨.រៀននិយាយពាក្យថា «បានទេ?» និង «អរគុណ»
ទម្លាប់សំខាន់មួយទៀត គឺការបង្រៀនកូនៗឱ្យចេះនិយាយពាក្យថា «បានទេ?» និង «អរគុណ» ដែលជាទម្លាប់នៃការនិយាយពាក្យបែបវិជ្ជមាន ដែលនឹងជួយសម្រាលស្ថានភាពផ្សេងៗ នៅពេលពួកគេធំឡើង។

៩.ការចែករំលែក គឺជាការយកចិត្តទុកដាក់
ប្រសិនបើកូនៗលោកអ្នកជាកូនទោល ឪពុកម្តាយ គួរតែបង្រៀនគេ អំពីសារៈសំខាន់នៃការចែករំលែកទៅដល់អ្នកដទៃ ប្រាប់ពួកគេថា ការចេះចែករំលែកនាំមកនូវភាពរីករាយ និងឱ្យពួកគេចេះត្រេកអរនូវសម្ភារៈក្មេងលេង ឬអ្វីដែលពួកគេមាន។ ដោយឡែក វាមិនសូវជាបញ្ហាចោទប៉ុន្មាននោះទេ សម្រាប់ក្មេងៗដែលមានបង ឬប្អូនបង្កើត។

១០.ចោលសំរាមនៅក្នុងធុងឱ្យបានត្រឹមត្រូវ
ឪពុកម្តាយ គួរតែពន្យល់ប្រាប់កូនៗថា ការចោលសំរាមពាសវាលពាសកាល នៅទីសាធារណៈ ដូចជា នៅតាមសួនច្បារ ជាដើម គឺជាការបង្ហាញពីគម្រូមិនល្អ ហើយបង្ហាត់បង្រៀនពួកគេឱ្យចេះចោលសំរាមទៅក្នុងធុងសំរាមឱ្យបានត្រឹមត្រូវ៕